انا فكرت اعمل سلسله لمواضيع عجبتنى انقلها لكم لكى نفيد ونستفيد ..... موضوع اكون قريته فى مجله ... فى جرايد ... لفت نظرى فى النت وانا رايح مشوار .. رحت جبتلكم المواضيع دى عشان زيى ما قلتلكوا نفيد ونستفيد
وعاوز اعرف رأيكوا فى فكرتى دى
هى فكره تقليديه ... بس الجديد انى هملها على هيئه سلسله وارقم المواضيع بالتتالى وكده يعنى
وهسميها سلسله اخترت لكم .....
(1)
الـبــوســـطـــجــى
محمود كان بوسطجى العباسيه .. طبيعى ان الناس كلها تعرفه .. لكن هو حافظنا بالاسم والشقه .. مش بس احنا . انما عارف أهلنا وأصحابنا .... يا ست فوزيه جواب من بنتك بطه .. يا ابراهيم افندى جواب العوايد .. يا حاجه فاطمه أخوكى باعتلك من اليمن ..... أحمد يا ويكا نادى الترسانه عايزك ... وماقولكش على فرحه كل واحد وهو بياخد جوابه وكأنه شيك بمليون جنيه...
محمود دا كان فقير لكن مهندم ... دايما لابس الكاكى زى كل البوسطجيه .. لما ياقة الجاكيت تدوب يلفها بمنديل محلاوى ... رجلين البنطلون تتقطع يدخلها فى الشراب ويلبس عليها أستك .. عمرك ما تلاحظ انها بدله واحده يلبسها صيف شتا .... يمكن يستلف شمسيه عشان المطر او يلبس تحتها بلوفر صوف عمره ما قال لحد فين البقشيش ؟؟ !! ... حتى وهو بيستريح على القهوه بعد يوم طويل .. ماكنش يقبل شاى من حد إلا من النوبى صاحب القهوه .. كان فى عزه نفسه ولا عنتره ........ طبعا زمان لا كان فى انترنت ولا ايميل ... ولا فيس بوك ولا يوتيوب .. الجوابات كانت وسيله الاتصال بين الناس ...
الام تعيط لما تشوف خط ابنها .. والعاشق يقعد يشم الظرف .. والتلميذ يفكر الف مره قبل ما يفتح جواب الكليه العسكريه ... والبقال والجزار يخافوا جدا من جواب الضرايب .. وبنت الجيران تفتح جوابى فى بير السلم .. ماكنتش أقدر اديها ورقه من ليها .. لحسن ابوها يدبحها .. كان بينى وبينها تلاته متر ..وبرضه كنت ابعت الجواب بالبوسته كأنى من بلد تانى !!! ( ايه اللؤم ده .... ده ايه الخبث ده ) هههههههههههههههههههه
محمود كان حريص جدا على الجوابات " المسوجر" لازم يسلمها باليد ... عمره ما ساب جواب عند بواب او مع جار أو عند دكان تحت العقار .
بس النهارده مابقاش حد يشوف " بوسطجى " .... البعيد بيكلم قرايبه بالتليفون .. أو الانترنت وبالكاميرا ممكن تشوفه .. لا حد عنده وقت يكتب جواب . ولا الناس بقيت فاضيه تقرأ ... وتصدق أن البوسطجى لما اختفى كان بدايه لاختفاء حجات كتييييير ..... معدش فيه عواطف .. ولا عاد حد عنده قدره على الابداع .. مبقاش فى خيال ولا اشتياق .. ولا حبيب يفكر فى كلام حلو ..ولا حبيبه فاضيه للعب العيال ... الحب بقى تسالى ولما العيال عرفت العرفى والمسيار ووقفه الكورنيش والاحضان ...بقى مفيش غالى ولا عزيز ... لا فى العواطف ولا فى البنى آدمين ....
محمود لما طلع معاش فكر يشتغل ( عرضحالجى ) قدام الشهر العقارى ...... ( انا أساسا مش فاهم معناها لو حد يعرف يقولى ) هههههههه..... المهم فقالوله اتنقل من العباسيه .. راح بترابيزته قدام مصلحه الاحوال .. يملا استماره مستخرج ميلاد او يكتب بيانات بطاقه ... لكن نفسه يجيى له واحد يقله اكتب لى جواب ....... الناس كلها بتكتب شكاوى ... والبوسطجى النزيه اتجنن من كتر ما كتب شكاوى ... مفيش حد راضى ... البلد جرالها ايه ... الكل يا ظالم يا مظلوم ... والمصيبه ان الظالم مبيبطلش ظلم ... ولا المظلوم بياخد حقه ....
محمود اتجنن لما لقى الناس كلها مهمومه ...لا عاد بيضحك فى وشه لما يديله جواب زمان ...ولا بقى يشوف الفرحه لما كان يقول " بوسته " ... خلاص الناس نسيت الضحك .... وعرفت الغلب ... ...
شكا لى همه من شهرين فى صلاه الجمعه ..... قلت له الدنيا اتغيرت يا محمود عن ايامنا والناس مش حتضحك تانى ...... لكن "حوده" قال لى ..... " والنبى بكره تروق وتحلى ... بس جربوا تكتبوا لبعض جوابات تانى !!! " .....
وانا بضم صوتى لعم محمود ومتفق معاه فى جملته الاخيره ..... يا ترى انتوا متفقين برضو ولا ........ ليكوا رأى اخر
هنعرف ده من خلال الردود .....
تحياتى لكم .... dr_khaled
ملحوسه صغنتوته كده : ........
معنى كلمه ( عرضحالجى )
هى كلمه ذات اصل تركى ويأتى مثلا على نفس وزنها قهوجى , مكوجى , وهكذا ....... وهى اصلا (عرض حاله ) اى انه يقوم بعرض حاله الناس للمسؤلين او شيئ من هذا القبيل ... وبإضافه حرف الجيم إاليها تصبح كما هى بالشكل النهائى ( عرضحالجى ) اى هو من يقوم بعمل عرض الحالات
الأربعاء أغسطس 20, 2008 1:22 pm
