عرفتوا ليه الدكتور نسي الفوطة في بطن المريض ..!!

نسى الفوطة نسى الفوطة
وناس واقفه بتتريأ ومبسوطه
وناس تانيه بتستغرب ومنقوطه ليه الدكتور نسي الفوطه
و هو يا عيني كان واقف ووشه أحمر ولا القوطه

و قال ياجماعه سامحوني وقبل ما تيجوا تلوموني
تعالوا أحكيلكوا أنا حكايتي وبعديها إبقوا حاكموني

سنين فاتت في ثانويه كفاح دامي وعرق ودموع
وبعد المعركه الحاميه قدرت أنجح وأجيب مجموع

أخيراً حلمنا إتحقق هخش الطب وأدّكتر
رساله جميله ومعاها مقام عالي وفلوس أكتر

و جاتلي بطاقة الترشيح فيها الطب اللي بحلم بيه
بتاع البوسته جابهالي وخدله حلاوه عشرة جنيه

في أول يوم لبست جديد وشلت البالطو رحت لاقيت
زمايلي إتحشروا في مدرج عامل ولا علبة الكبريت

ولكن برضه مايئستش

دخل دكتور قعد يشرح كلام كان صعب ولاتيني
و أنا متنح ومش فاهم لاقيت النوم غلب عيني

و لسّه أنا برضه مايئستش

و قلت مادام ضاع النظري هظبّط نفسي في العملي
جريت ع المشرحه بسرعه لكن كالعاده خاب أملي

دخلت لاقيت 200واحد بيتخانقم على الجثه
وناس واقفه من الزحمه على كتافي ومش حاسه

و لسّه أنا برضه مايئستش

و طبعاً حسّوا بظروفنا وحطّولنا إمتحان فوازير
وكل أمّا آجي أحل سؤال أقف أدامه زي الزير

و لسّه أنا برضه مايئستش

وجينا في لجنة الشفوي وكان أدّامي واد كوسه
خد ال full mark مرتاحة وخد فوقهم كمان بوسه

و لسّه أنا برضه مايئستش

دخلت قام مكشرلي كإني مش human face
سألني سؤال ماردّيتشي قاللي أخرج يا hopless case

ولسه أنا برضه ما يئستش

سنه بتمشي وسنه بتيجي مقالب بعدها مقالب
زمايلي إتعينوا و قبضوا و أنا شايل لقب طالب

و لسّه أنا برضه مايئستش

كبرنا شويه وقالولنا خلاص دلوقتي شوفوا حالات
و رحنا نشوف وكالعاده دا كله بيطلع إشتغالات

و لسّه أنا برضه مايئستش

بشوف الشاب من سني واقف ويّا الصحاب مرتاح
و لو عديت أنا يقولوا راح الدحّاح جه الدحّاح

و لسّه أنا برضه مايئستش

لحد ماخلصم السبعه وقلت خلاص هروق وهعيش
و قبل ما أفوق من الصدمه خدوني عشان أخش الجيش

و لسّه أنا برضه مايئستش

وقعت هناك في إيد ظابط ظغرلي وقال يا بسكوته
أحب أبشرك إنك معايا هتطفح الكوته

و لسّه أنا برضه مايئستش

خلااااص السبعه بقوا عشرة ولسه أنا ماشي جنب الخيط
و بان السن على وشي و شعري إبيض و إصلعيت

و لسّه أنا برضه مايئستش

وبعد ما قلت كفاره خلاص هرتاحلى بقى كام يوم
لاقيتهم تاني واخدنّي عشان تكليفي في السلوم

و لسّه أنا برضه مايئستش

و قلت هناك هآخد قرشين آكل منهم و أجيب لبسي
فوجئت يا عيني بمرتب يادوب مايقضنيش شيبسي

و لسّه أنا برضه مايئستش

و بعد العمر دا كله رموني في وحده صحية
نسيت الطب أنا فيها وبقيت زي التمرجيه

و لسّه أنا برضه مايئستش

و آديني بعيش وهعمل أيه؟؟ ماليش ولا قوه ولا حولا
وحيد غلبان وحتى مافيش جواز على نفقة الدوله

و لسّه أنا برضه مايئستش

قام الدكتور صعب ع الناس و فضلم يبكوا على حاله
و حتى الفوطة نسيوها ولموا فلوس وسابوهاله

و قال دكتورنا ع الفوطه تعالوا هشيلها أنا بكرة
لكن اهل المريض قالوا خلاص سيبهالنا للذكرى


,شكراً -